Komisioni Europian publikon Raportin e Progresit 2009
Në kuadër të Politikës së Zgjerimit të BE-së, respektivisht instrumentit të Partneritetit Europian, Komisioni Europian sot publikoi Raportin e Progresit vjetor për shtetet kandidate dhe potencialisht kandidate.
Raportet e Progresit shkruhen për secilin vend të Ballkanit perendimorë dhe kanë strukturë të njëjtë. Raportet analizojnë situatën politike të këtyre vendeve për sa i përket fushave si: demokracia, sundimi i ligjit, të drejtat e njeriut, mbrojtja e minoriteteve dhe bashkëpunimi rajonal. Gjithashtu përmes këtyre raporteve analizohet edhe situata ekonomike dhe përmbushja e kritereve sektoriale të njohura si standardet e BE-së apo Acquis Communautaire.
Përmes këtij raporti bëhet një shqyrtim i kapaciteteve të këtyre vendeve për zbatimin e standardeve Evropiane apo me fjalë tjera mbi përafrimin e legjislacionit dhe politikave të saj me ato të BE-së..
Raporti përpilohet nga informatat dhe analizat e përpunuara nga ana e Komisionit Europian. Në përpilimin e raporteve të progresit Komisioni përdor burime të ndryshme informatash. Komisioni Europian shfrytëzon informata nga autoritetet vendore, vendet anëtare të BE-së, Parlamenti Europian, organizata ndërkombëtare qeveritare dhe joqeveritare si dhe konsulton organizatat vendore të shoqërisë civile.
Progresi i arritur nga vendet kandidate dhe potenciale kandidate vlerësohet në bazë të vendimeve të marra, legjislacionit të aprovuar dhe masave apo veprimeve të zbatuara. Me qëllim të sigurimit të qasjes së barabartë, ligjet apo masat që janë në përgatitje e sipër apo janë në pritje për aprovim nuk merren parasysh. Kjo qasje siguron që vlerësimi dhe progresi i shënuar të jetë objektiv për të gjitha vendet.
Raporti i Progresit i këtij viti është me rëndësi të posaqme për Kosovën, për shkak që shoqërohet edhe me një Studim për Kosovën, të ngjajshëm me Studimin e Fizibilitetit që është nxjerrë për të gjitha vendet tjera të Ballkanit Perendimor që kanë kaluar këtë fazë.
Për të shkarkuar këtë raport në gjuhën angleze, ju lutem klikoni më poshtë:
